Sámi Dáiddamusea birra
Sámi Dáiddamusea lea RiddoDuottarMuseat ja Davvi-Norgga dáiddamusea museaperformánsa.
Jagi 2017 jávkkai Davvi-Norgga Dáiddamusea guovtti mánnui ja dan sadjái bođii hutkojuvvon ásahus. Sjøgata 1 lanjat Romssas nuppástuvve sihke fysalaččat ja sisdololaččat danin mii livččii sáhttán leat Sámi Dáiddamusea.
Go musea nuppástuvai sihke siskkáldasat ja olgguldasat, de lonuhedje dát guokte ásahusa performatiivvalaččat saji. Sámi Dáiddamuseas lei eará dáiddačoakkáldat ja iežas gráfalaš identitehta, sierra gulahallanvuogádagat ja sierra museai guoskevaš áđat dego poastakoarttat, plakáhtat, visihttakoarttat ja vuovdingálvvut.
Dainna lágiin ráhkaduvvui muhtunlágan molssaevttolaš duohtavuohta, mas Sámi Dáiddamusea rabai uvssaidis guovvamánu 15. beaivvi 2017 rahpančájáhusainis There Is No, mii lei Sámi Dáiddamusea váldun. Go performánsa nogai, Davvi-Norgga Dáiddamusea válddii badjelasas There Is No -čájáhusa, mii lei fiktiiva sámi dáiddamusea duođalaš váimmus. Čájáhus fállá gehččiide válljejuvvon dáidagiid sámi dáiddačoakkáldagas, mat gullet RiddoDuottarMuseai Kárášjogas. Sámi Dáiddamusea ja There Is No ledje mearihis bivnnuhat, badjel 8000 geahčči fitne ja ráhkadedje ođđa gehččiidolahusa.
Jurdda museas, mas čájehit dušše sámi dáidaga, bohciidii 1970-logus joatkkan sámiid vuoigatvuođaid rahčamušaide. Plánat, maid vuođul Davvi-Norgga Dáiddamusea ásahuvvui, badjánedje maid 1970-logus ja gulle soađi maŋŋásaš almmolaš boaittobealeguovlluid politihkkii. Davvi-Norgga Dáiddamusea ásahuvvui jagi 1985 ja rahppojuvvui álbmoga várás golbma jagi dan maŋŋá. Dáiddamusea, maid sámi dáiddabirrasat, museabirrasat ja servodat leat vuorddašan, baicce ii leat vel duohtan dahkkojuvvon.
Museaperformánsan Sámi Dáiddamusea joatká árjjalaččat ovddideami, mii namuhuvvon guovtti ásahusas lea leamaš. Performánssain isket mat museat leat, maid dat barget ja mo doibmet – sámi oktavuođas, norgalaš oktavuođas ja vel viidásat geahčadeamis. Dat lea cealkámuš dálá riikkadási ja riikkaidgaskasaš digaštallamiidda našuvdnahuksema ja kulturpolitihka birra. Go olmmoš árvvoštallá Norgga 200-jagi ávvudeami iehčanas riikan jagi 2014 ja vuosttaš sámi riikkačoahkkima čuohtejagi ávvudeami Tråantes (Troanddimis) jagi 1917, de lea performánsa hui áigeguovdil jagi 2017. Dan oktavuođas Sámi Dáiddamusea jearrá áibbas heivvolaččat ja lunddolaččat manne sámi dáidda váilu Norgga dáiddaásahusain ja Norgga dáiddahistorjjás.
Sámi Dáiddamusea livččii sáhttán šaddat, ja sáhttá ain šaddat duohtan.